Ўзбекистон ва Тожикистон крикет федерациялари ўртасида меморандум имзоланди

Хусусан, марказий Осиёда крикет бўйича ҳамкорликни кенг йўлга қўйишни мақсад қилган Ўзбекистон крикет федерацияси Тожикистон крикет федерациясига таклиф йўллаган эди. Ушбу таклифага кўра, 8 февраль куни Тожикистон крикет федерацияси президенти Нажибуллоҳи Рўзи Тошкент шаҳрига етиб келди. Федерация масъуллари томонидан муносиб кутиб олинган меҳмон дастлаб Ўзбекистон крикет федерацияси раиси Азиз Михлиев ҳамроҳлигида  ЎКФ томонидан бунёд этилаётган крикет стадиони билан яқиндан танишди.  

Шунингдек, Нажибуллоҳи Рўзи пойтахтимизнинг Юнусобод туманида жойлашган крикет академиясини ҳам бориб кўрди ва мамлакатимизда жисмоний тарбия ва спорт соҳасига ва албатта крикет спорт турининг тез фурсатларда ривожланиш босқичига ўтганлигини ҳавас билан эътироф этди. Бугун 10 февраль куни эса Ўзбекистон  крикет федерациясида федерация раиси Азиз Михлиев ҳамда Тожикистон крикет федерацияси раиси Нажибиллоҳи Рўзи ўртасида икки томонлама ҳамкорликни ривожлантиришга қаратилган меморандум имзоланди. Ушбу имзоланган ҳужжатга кўра, эндиликда ҳар иккала мамлакат крикетчилари ўртасида халқаро крикет кенгаши (ICC) томонидан таъсис этилган уч босқичли халқаро мусобақаларни ўзаро ҳамкорликда ўтказишади ва бу билан ҳар иккала федерациялар халқаро крикет кенгаши (ICC) талабларини бажариб боришган бўлади. Меморандумга мувофиқ, жорий йилнинг май ойида Тожикистоннинг  крикет бўйича эркаклар ва аёллардан иборат терма жамоалари Тошкентга ташриф буюришади ва илк бор  мамлакатимизнинг крикет бўйича терма жамоалари билан ўзаро беллашишади.

Илҳом РАҲМОНОВ тайёрлади