Ўзбекистонда илк бор Падель тенниси бўйича клуб фаолият бошлади + ФОТОГАЛЕРЕЯ

Кеча, 15 май куни пойтахтимизнинг Юнусобод туманида жойлашган "Юнусобод спорт мажмуаси" ҳудудида Ўзбекистон учун янги спорт тури бўлмиш падель тенниси бўйича Padel.Uz клубининг тантанали очилиш маросими бўлиб ўтди. 

Тадбирда клуб асосчилари, шунингдек, Ўзбекистон ёшлар сиёсати ва спорт вазири ўринбосари Шаҳрулло Маҳмудов сўзга чиқиб, клуб, жумладан мазкур спорт турининг юртимизда ривожланиши учун бор имконият ишга солинишини айтди.

Таъкидлаш жоиз, падель тенниси илк бор 1969 йилда Мексикада ўйлаб топилган. Ушбу спорт тури катта теннисдан биринчи навбатда, кортнинг кичиклиги билан фарқ қилади, падель тенниси кортлари катта теннисдан фарқли равишда ёпиқ кортлардан иборат бўлади.

Шунингдек, падель тенниси коптогида ҳам катта теннисникига қараганда бироз босим пастроқ ҳисобланади. Аммо ўйин қоидалари ва тизим катта теннис билан фарқ қилмайди. Мазкур спорт тури ҳали олимпия ёки паралимпия дастурларига киритилмаган, аммо Халқаро Падель Федерацияси фаолият юритади.

Padel.Uz клубининг Тошкентда иккита филиали мавжуд бўлиб, у ерда хорижий мутахассислар фаолият юритади. Тез орада юртимизда мазкур спорт тури бўйича федерация очилиши кутилмоқда.


Тадбирдан олинган суратларни томоша қилинг:

Суратлар муаллифи - Ҳабиб Жўрабоев