Ўзбекистонлик боксчи лицензион турнирда Озарбайжон таркибида иштирок этмоқда

Ушбу турнирда ўзбекистонлик боксчи қиз - Маржона Савриева Озарбайжон терма жамоаси сафида иштирок этмоқда. У бугун 50 кг.гача бўлган вазн тоифасидаги баҳсларнинг 1/16 финалида иорданиялик Ҳанан Нассарга қарши рингга чиқади. 

Айни пайтда бокс бўйича Озарбайжон эркаклар терма жамоасида ўзбекистонлик мутахассис Равшан Ходжаев ҳам мураббий сифатида фаолият олиб бораётганини таъкидлаш лозим. Шунингдек, яна бир боксчимиз Саиджамшид Жафаров ҳам лицензион турнирларда ушбу мамлакат шарафини ҳимоя қилиши мумкинлиги ҳақида миш-мишлар тарқалган эди, бироқ бу амалга ошмади.

Маълумот учун, Маржона Савриева Ўзбекистон аёллар терма жамоаси сафида "Елорда кубоги" ва бошқа халқаро мусобақалар, шунингдек, мамлакат биринчилигида совриндор бўлган. 2022 йилги Ўзбекистон чемпионатида -48 кг вазн тоифасида бронза медалини қўлга киритган. Шу йилнинг январь ойида Сербиядаги турнирда Озарбайжон таркибида қатнашиб, саралаш босқичида ҳамюртимиз Феруза Казаковага ютқазганди. Феруза якунда ушбу турнир чемпионига айланган эди.