Ўзбекистонлик ёш велоспортчи қиз август ойида жиддий йўл-транспорт ҳодисасига учрагани маълум бўлди

"Жорий йилнинг 21 август куни Насиба Шерқўзиева иштирокида йўл-транспорт ҳодисаси содир бўлган. Воқеа рўй берганидан сўнг Ўзбекистон велоспорт федерацияси раиси Нарбаева Танзила Камаловна ёш велоспортчимиз Насиба Шерқўзиеванинг саломатлигидан шахсан хабардор бўлиб, муолажалар жараёнини тўлиқ ўз назоратига олган. Ҳозирда спортчининг даволаниши билан боғлиқ барча муолажалар ва дори-дармонлар давлат томонидан таъминлаб берилмоқда. Спортчи Республика шошилинч тиббий ёрдам илмий марказида зарур муолажаларни давом эттирмоқда", дейилади ташкилот хабарида.

ОАВда тарқалган хабарларга кўра, 15 ёшли Насиба Олимпия захиралари коллежи ўқувчиси ҳисобланади. Уни 21 август куни Ғазалкентда "Камаз" юк машинаси уриб юборгани айтилмоқда. Ачинарлиси, спортчи илк текширувлар чоғида нотўғри операцияни бошдан кечирган. Ҳозирда шифокорлар велоспортчининг ҳаёти учун курашмоқда. 

Маълум бўлишича, Насиба Шерқўзиеванинг даволаниши билан боғлиқ жараёнда моддий қийинчиликлар кузатилмоқда.