Шахматчиларимиз Жаҳон чемпионатида 3 та олтин медаль билан умумжамоа ҳисобида иккинчи бўлишди!

Қувонарлиси, ушбу дунё биринчилигида ўзбекистонлик ёш шахматчилар ҳам муваффақиятли иштирок этишди. 

Сарвиноз Бегмуратова 13 ёшгача қизлар ўртасида 9 имкониятдан 7,5 очко тўплаб, бирор мағлубиятсиз чемпионликни қўлга киритди. Сарвиноз ушбу муваффақияти билан FIDE Women FIDE Master (WFM) унвонини олиш имкониятига ҳам эга бўлди.

Нилуфархон Имомқўзиева 15 ёшгача қизлар ўртасида 7 очко жамғариб, мусобақа ғолибасига айланди. У Сербия, Руминия, Ҳиндистон, Куба ва Грузиянинг кучли шахматчиларини мағлубиятга учратиб, халқаро рейтингини 60 пунктга оширишга муваффақ бўлди.

Нурмуҳаммад Неъматиллахонов эса 9 ёшгача бўлган ўғил болалар ўртасида 7,5 очко жамғариб, олтин медални қўлга киритди. 

Жаҳон чемпионати якунларига кўра, Ўзбекистон терма жамоаси 3 та олтин, 2 та кумуш ва 2 та бронза медали билан Қозоғистон вакилларидан кейин иккинчи ўринни эгаллади.

Ўзбекистон шахмат федерацияси матбуот хизмати