Париж-2024 лицензиатлари: Олимпиадада медаль кутаётганимиз Разамбек Жамалов

Бекзод Абдураҳмонов апрель ойида Қирғизистонда ўтган лицензион турнир орқали Ўзбекистон делегацияси ҳисобига Париж-2024 йўлланмасини тақдим этган эди. Мураббийлар штабининг қарорига кўра, бугунги кунда атлетларнинг спорт формаси ва сўнгги турнирларда қайд этган натижасини инобатга олган ҳолда Разамбек Жамалов Париж гиламларида курашадиган бўлди.

Жамалов Разамбек Саламбекович 1998 йил 1 июнь куни Россия Федерациясининг Хасавюрт шаҳрида туғилган. Мураббийи Олим Ҳикматов. 2024 йилдан Ўзбекистон терма жамоаси аъзоси. Курашчимиз июнь ойида Венгриянинг Будапешт шаҳрида ўтган рейтинг турнирида иштирок этиб, олтин медални қўлга киритди. Разамбек мусобақа давомида Париж-2024 лицензиати венесуэлалик Энтони Монтеро, шунингдек, грузиялик Гиорги Элкабидзе, эронлик Али Аббос ва финалда венгриялик Мурад Курамагомедов каби таниқли полвонларни мағлубиятга учратишга муваффақ бўлди.

Жамалов қитъавий лицензион турнир орқали Ўзбекистон терма жамоаси учун қўлга киритилган йўлланма эвазига Париж-2024 ёзги Олимпия ўйинларида -74 кг вазн тоифасида курашади.