Париж-2024: Спорт курашларида неча нафар спортчи билан қатнашамиз?

Таққослаш учун 2021 йили Токио мезбонлик қилган Олимпиадада спорт курашларида 8 нафар спортчимиз иштирок этганди. Ўшанда эркин курашда 4 нафар, юнон-рум курашида 4 нафар спортчи юртимиз шарафини ҳимоя қилганди. 

Бу сафарги Олимпиада учун лицензион мусобақаларнинг барчаси ўз якунига етди. Куни кеча Туркиянинг Истанбул шаҳрида якунланган жаҳон квалификацион турнирида афсуски хеч бир  спортчимиз лицензия қўлга кирита олмади. 

Бунгача ўтказилган лицензион турнирлар - 2023 йилги жаҳон чемпионати ва Осиё квалификацион турнирида вакилларимиз 7 та йўлланмани қўлга киритиб улгуришганди. Ушбу натижа ўзгаришсиз қолди.  

Олимпия ўйинларида умумий ҳисобда 18 та вазн тоифасида медаллар жамланмаси ўйналади - эркин кураш (6 та), юнон-рум кураши (6 та) ва аёллар кураши (6 та). 

Қайд этиш лозимки, спорт курашлари Олимпия ўйинларида делегациямизга мунтазам равишда медаль тақдим этувчи йўналиш ҳисобланади. 

Ўзбекистон Олимпиадаларда спорт курашларида қуйидаги натижаларни қайд этган: 

1996: - (10 та лицензия)

2000: Артур Таймазов (кумуш) (11 та лицензия)

2004: Артур Таймазов (олтин), Александр Докторашвили (олтин), Магомед Ибрагимов (кумуш) (7 та лицензия)

2008: Артур Таймазов (олтин), Сослан Тигиев (кумуш) (8 та лицензия)

2012: Артур Таймазов (олтин), Сослан Тигиев (бронза) (8 та лицензия)

2016: Елмурат Тасмурадов (бронза), Ихтиёр Наврўзов (бронза), Магомед Ибрагимов (бронза) (8 та лицензия).

2021: Бекзод Абдураҳмонов (бронза) (8 та лицензия).

2024: 7 та лицензия.

Статистикадан кўриниб турибдики, бунгача лицензиялар борасидаги энг ёмон натижа 2004 йилда бўлган. Бироқ натижа борасидаги энг зўр кўрсаткичимиз ўшанда амалга ошган: Ўзбекистон спорт курашчилари 7 та лицензия билан Олимпиадада қатнашган ва 3 та медаль қўлга киритиб, мусобақани умумжамоа ҳисобида 3-ўринда якунлаган экан. 

Яхши янгилик ҳам бор. Бу сафар илк бор аёллар кураши бўйича лицензия қўлга киритилган. Актенге Кеунимжаева спортимиз тарихида илк бор аёллар кураши бўйича баҳсларда Олимпиадада қатнашади.

Париж олимпиадасида қатнашадиган спортчиларимиз: 

Эркин кураш:

-57 кг: Ғуломжон Абдуллаев

-74 кг: Бекзод Абдураҳмонов

-86 кг: Жавраил Шапиев

Аёллар кураши:

-50 кг: Актенга Кеунимжаева

Юнон-рум кураши: 

-60 кг: Исломжон Баҳромов

-77 кг: Арам Варданян

-97 кг: Рустам Ассакалов.

Лицензияларимиз камайган. Лекин энг яхши натижамиз қайд этилган 2004 йилда ҳам айнан 7 нафар спортчи билан Олимпиадада қатнашганмиз. Курашчиларимиз ўша йилги медаллар борасидаги натижани ҳам такрорлай олишармикин? Спортчиларимизга мухлислик қилган ҳолда Париж Олимпиадасини кузатамиз!