Paris Masters. Хачанов 1/2 финалда, у рейтингда яна Топ-20`га қайтади

Дунёнинг 21-ракеткаси Карен Хачанов нуфузли мусобақанинг ярим финал иштирокчисига айланди. Россиялик теннисчи роппа-роса 70 дақиқа давом этган 1/4 финалда дунёнинг 9-ракеткаси болгариялик Григор Димитровни ортиқча қийинчиликсиз мағлубиятга учратди - 6/2, 6/3.

Карен фаолиятида илк бор тажрибали рақибини мағлуб этишнинг уддасидан чиқди - 1:4. Бундан аввалги барча тўрт учрашувда Григорнинг қўли баланд келганди. Хачанов 6, Димитров 4 та эйс зарбасини амалга оширган. Брейклар бўйича ҳам мутлақ устунлик рус теннисчиси томонида бўлди - 4 га 0! 

Хачанов фаолиятида бешинчи, бу йилги мавсумда эса илк бор "Мастерс" турнирининг ярим финалига чиқди. У душанба куни эълон қилинадиган ATP рейтингида яна Топ-20`га қайтади. Энди у Rolex Paris Masters 1/2 финалида франциялик Уго Умберга қарши кортга чиқади.