PFL Фрэнсис Нганну билан шартномани муддатидан олдин бекор қилди

"Professional Fighters League Фрэнсис Нганну билан хайрлашишга қарор қилди, - дейилади ташкилотнинг шу муносабат билан эълон қилинган баёнотида. - Биз Фрэнсисга ҳам спортчи, ҳам инсон сифатида катта ҳурмат билан қараймиз ва унинг яккакурашлардаги фаолиятининг кейинги босқичида муваффақият тилаймиз".

Нганну UFC’ни тарк этганидан бир неча ой ўтиб, 2023 йилда PFL билан шартнома имзолаганди. Бу промоушенда камерунлик янги шартнома шартлари бўйича раҳбарият билан келиша олмади. Шартномага кўра, у лигада иккита жанг ўтказиши ва биринчиси учун 8 миллион иккинчисига 12 миллион доллар гонорар олиши керак эди. Натижада, Фрэнсис PFL`да атиги битта жанг ўтказди ва 2024 йил октябрь ойида Ренан Феррейрани биринчи раунддаёқ техник нокаут билан мағлуб этди.

Сўнгги пайтларда 39 ёшли Фрэнсис Нганну Оқ уйдаги турнирда иштирок этиш учун UFC’га қайтиш истагини бир неча бор очиқчасига билдирганди.