PFL лигаси расман Bellator промоушенини сотиб олди

Бу ҳақда Financial Times нашрига берган интервьюсида PFL асосчиси Донн Дэвис хабар берди. Дэвиснинг сўзларига қараганда, Bellator промоушенининг шу пайтгача эгаси бўлиб келган Paramount Global компанияси ҳам ташкилотда кичик улушга эга бўлиб қолади. Bellator жангчилари бир вақтнинг ўзида PFL октагонида, ўз ўрнида PFL аралаш яккакураш усталари Bellator`да жанг қилишлари мумкин бўлади. 

Бундан ташқари, 2024 йилда PFL ва Bellator ҳамкорликда турнир ўтказади. Унда икки промоушен чемпионлари ўзаро октагонда тўқнаш келади. PFL раҳбарлари UFC промоушенини индустрияда якка ҳокимлик мақомидан олиб ташлаш истагида эканликларини яширишмаяти. 

"Бизнинг бу юришимиз ММА ландшафтини тўлалигича ўзгартиради. ММА оламидаги иккита иккинчи рақамлилар бирлашди. Бу катта куч. PFL ва Bellator қўшма ростеридаги 30 фоиз жангчилар Fight Matrix версияси бўйича жаҳоннинг Топ-25 жангчилари қаторига киради", - деди Дэвис.

Bellator MMA расмийлари ҳам ушбу савдонинг расман амалга ошганини тасдиқлашди. 

"Биз PFL оиласи билан бирлашдик", - дейилади ташкилотнинг ижтимоий тармоқдаги саҳифаларида.

Шанба оқшомида Bellator MMA лигаси Чикагода Bellator 301 турнирини ўтказди. Айни пайтда ташкилотнинг расмий тақвимида режалаштирилган ҳеч қандай турнир йўқ. PFL лигаси эса 24 ноябрь куни мавсумнинг финал турнирини ўтказади. Унда 2023 йилги мавсум чемпионлари аниқланади.