Пимблетт Жаред Гордон билан реванш жангини ўтказиш ниятида

Енгил вазн тоифасида британиялик UFC жангчиси Пэдди Пимблетт америкалик Жаред Гордонга қарши реванш жангини ўтказиш истаги борлигини маълум қилди.

"Одамлар Гордоннинг яхши жанг қилганини айтмоқда. Лекин у буни жароҳат олганим туфайлигина амалга ошира олди. Энди у ўзини хафа қиздек тутиб, ҳар бир интервьюсида ғалаба қозонгани ҳақида гапиряпти. Йил сўнггида унинг юзига мушт туширмоқчиман. Умид қиламанки, у Бобби Гринни мағлуб этади, шунда мен унинг таъзирини беришим мумкин бўлади. Мен ўша пайтда оғир аҳволда эдим, лекин у шу ҳолатда ҳам мени мағлуб эта олмади. Ҳатто жароҳат олган ҳолатимда ҳам", - деди Пимблетт.

Пимблеттнинг Жаред Гордонга қарши жанги 2022 йил декабрь ойида UFC 282 турнири доирасида бўлиб ўтган эди. Мазкур жанг тўлиқ давом этиб, Пэдди Пимблетт фойдасига якунланган эди.

Маълумот учун, Жаред 22 апрель куни UFC Fight Night 222 турнирида Бобби Грин билан тўқнаш келади.