Погба драмаси. Италиядан ташвишли хабар

Ярим ҳимоячи Поль Погба ўтган ёзда "Манчестер Юнайтед"ни тарк этган ва узоқ йиллардан сўнг "Ювентус"га қайтишга қарор қилганди. Бироқ жорий мавсумда у июль ойидаги жамоа йиғинида тиззасидан олган жароҳати сабаб "кекса синьора" сафида майдонга тушмади.

Футболчи операция қилишга қарор қилди. Шу тариқа, у Жаҳон чемпионатидан четда қолди. Бироқ у декабрь ойидаёқ машғулотларга ва ўйинларга қайтадигандек эди.

"Football Italia" хабарига кўра, афсуски, бунинг иложи йўқ. Франциялик футболчининг тикланиши кутилганидан секинроқ кечмоқда. Сентябрдаги операциядан кейинги 8 ҳафталик режа иш бермади. Демак, тренажёр зали ва бассейнда шуғулланаётган Погба февралдан олдин сафга қайтиши даргумон.

Погбанинг жароҳати "Ювентус" қишда Адриен Рабьо билан хайрлашмоқчи эмаслигини англатади, гарчи бундай маълумотлар илгари пайдо бўлган бўлса ҳам.

Рабьо мавсумни Туринда якунлаши, сўнгра клубини алмаштириши кутилмоқда. Ҳозирда у Франция терма жамоаси сафида Қатардаги Жаҳон чемпионатида иштирок этмоқда.