Жейк Полнинг рақиби GLORY собиқ чемпиони бўлади

Унинг рақиби GLORY яримоғир вазн тоифаси собиқ чемпиони, франциялик Седрик Думбе бўлади. Бокс жанги саккиз раундга мўлжалланган ва биринчи оғир вазн тоифасида (90.7 кг ёки 200 фунтгача) ўтказилади.

"Икки йил олдин Седрик Думбе кимнидир тўққиз сонияда нокаутга учратганидан кейин менга жанг таклиф қилган эди. Хўш, энди сенда имконият бор. Мен ўзимни эплай олмайман, жағим ҳам яхши ҳолатда эмас ва сенда бўлганидек кикбоксинг бўйича чемпионлик унвонларим йўқ. Лекин биласанми нима? Бу кикбоксинг эмас, дўстим. Бу бокс! Худди Усик Рико Верхувенни енгганидек, мен ҳам сени Рождество арафасида Дубайда кечки овқатга айлантираман, кейин эса аренада кола ичиб ғалабамни нишонлайман.

Сен кўп гапиришни яхши кўрасан, шунинг учун кейинги ҳафта Париж ва Дубайдаги матбуот анжуманларида менга юзма-юз нима дейишингни кўрамиз. Фахрли Франция халқига шуни айтмоқчиман: мен қиладиган ишим учун узр сўрайман, лекин ўғлингиз ёмон хулқ-атвор кўрсатди ва энди у жазоланади. Дубай, Яқин Шарқ ва Шимолий Африкадаги барча мухлисларга – биз Дубайдагидек, ҳамиша бўлганидек, катта тантана билан шоу қиламиз. Мен қайтдим!", – деди 29 ёшли америкалик расмий матбуот баёнотида.

34 ёшли Седрик Думбе ММАга ўтган энг кўп унвонга эга кикбоксчилардан бири ҳисобланади. Кикбоксинг фаолияти давомида у 45 марта нокаут билан ғалаба қозонган ва GLORY яримоғир вазн тоифасида икки марта чемпионлик камарини қўлга киритган.

Унинг аралаш яккакурашлар рекорди олтита нокаутли ғалаба ва битта муддатидан олдин мағлубиятдан иборат бўлиб, у PFL лигасида бармоғига тикон киргани сабабли мағлуб бўлган. Француз сўнгги жангини 2024 йил май ойида Париждаги Bellator турнирида ўтказиб, Жалил Уиллисни техник нокаут билан енгган.

"Жейк Пол ўзини "Муаммоли бола" деб атайди, лекин у ҳали мендек муаммога дуч келмаган. У французнинг нималарга қодир эканлигини тасаввур ҳам қила олмайди ва 24 декабрь куни Дубайда мен бу Жейк Пол исмли товуқни кечки овқатга айлантираман.

"Жейк кўп гапиришни яхши кўради, мен ҳам шундайман, лекин Жошуа унинг жағига қилган ишидан кейин, унда гапиришга кўп имконият қолмаган бўлса керак. Мен Жошуа бошлаган ишни тугатаман. Дубай мен учун алоҳида шаҳар, ва Рождество арафасида унинг ҳушсиз ётган жасади устидан Франция байроғини (триколор) кўтарамиз. Франция, бу ғалаба сиз учун бўлади!" – деб изоҳ берди Думбе жанги ҳақидаги эълонини.

Жейк Пол охирги марта рингга ўтган йилнинг декабрь ойида чиққан эди, ўшанда у енгил вазн тоифасида собиқ жаҳон чемпиони Энтони Жошуага олтинчи раундда нокаут билан ютқазганди, Жошуанинг сўнгги зарбаси унинг жағини икки жойидан синдирган эди.