Poland Open. Олимпиада лицензиантлари шоҳсупада. Жалгасбай чемпион, Мўминжон ва Елмуратда бронза!

Poland Open рейтинг турнирида дунёнинг кўзга кўринган, аксари Токио Олимпиадасига йўлланма қўлга киритган эркин, юнон-рум ва аёллар кураши вакиллари иштирок этяпти. Улар орасида юртимиз шарафини юнон-рум курашчиларимиз ҳимоя қилишмоқда. 

Қувонарлиси, юнон-рум кураши мусобақасининг биринчи куни терма жамоамиз аъзолари 1 та олтин, 2 та бронза медалини қўлга киритишди. Уларнинг уччаласи Токио Олимпиадаси лицензианти экани диққатга сазовор. 82 кг вазн тоифасида гиламга чиққан Жалгасбай Бердимуратов барча рақибларини енгиб, Poland Open чемпионига айланди. Қорақалпоғистонлик курашчимиз нимчорак финалда польшалик Иван Нилипюк (11-3), чорак финалда эстониялик Ранет Калжола (2-0), ярим финалда швециялик Алекс Кессидисни (5-1) ҳисобида мағлубиятга учратди. Олтин медаль учун кечган беллашувда эса украиналик Ярослав Филчаковдан устун келди. 

67 кг вазн тоифасида юртимиз шарафини ҳимоя қилган икки курашчимиз Маҳмуд Бахшиллоев ва Елмурат Тасмурадов бронза медали учун кечган баҳсда ўзаро тўқнаш келишди. Тажриба бобида устунроқ бўлган Рио Олимпиадасининг бронза медали совриндори, беш карра Осиё чемпиони, Токио Олимпиадаси лицензианти ҳисобланган Тасмурадов ўзбек дербисида ғалаба қозониб, бронза медалини қўлга киритди. Терма жамоамизга иккинчи бронза медалини 130 кг вазн тоифасидаги полвонимиз Мўминжон Абдуллаев тақдим этди. Токио Олимпиадаси лицензианти бронза учун кечган беллашувда чилилик Ясмани Акоста Фернандесни мағлубиятга учратди.