Политт "Тур де Франс" 12-босқичи ғолиби + ФОТО

Bora-Hansgrohe жамоаси шарафини ҳимоя қилаётган Политт белгиланган 159,4 км масофани 3 соату 22 дақиқа 12 сония ичида босиб ўтди. Иккинчи ўринни Movistar жамоасининг испаниялик пойгачиси Иманоль Эрвити (+0.31) эгаллади. Lotto Soudal вакили, австралиялик Харри Суини (+0.31) маррага учинчи бўлиб етиб келди.

Бугун 13-босқич пойгаси 219,9 км масофада ўтказилади. Ортда қолган 12 босқич якунларига кўра словениялик Тадей Погачар (UAE Team Emirates) пешқадамлик қиляпти. Колумбиялик Ригоберто Уран (+5.18) иккинчи, даниялик Йонас Вингегор (+5.32) учинчи поғонадан жой олган.

Маълумот учун, нуфузли "Тур де Франс" мусобақаси ўз тарихида 108-маротаба ташкил этиляпти. Бу йилги баҳслар Франция ва Андорра давлатлари ҳудудида ўтказиляпти. 21 босқичдан иборат пойганинг умумий масофаси 3 414 километрни ташкил қилади. Финиш 18 июль куни Париж шаҳридаги машҳур Елисей майдонида бўлиб ўтади. Ўтган йили Тадей Погачар (UAE Team Emirates) мусобақа ғолиби бўлганди.