Полвонларимиз жаҳон чемпионатида 7 та медаль қўлга киритишди

Мазкур дунё биринчилигида олти нафар жиззахлик, бир нафар хоразмлик полвонлардан иборат терма жамоамиз аъзолари ҳам Ватанимиз шарафини ҳимоя қилишди. 

Шу ўринда таъкидлаш жоиз, 2021 йил ноябрь ойида Жиззах шаҳрида ўтказилган жаҳон чемпионати доирасида Татаристон Республикаси Спорт вазири ўринбосари Халил Шайхутдинов ҳамда Жиззах вилояти ҳокими Эргаш Салиев ўртасида жисмоний тарбия ва спортни ривожлантириш борасида ҳамкорлик меморандуми имзоланганди. 

Мазкур меморандумга мувофиқ Татаристон Республикаси спорт вазири Владимир Леонов ва Халқаро белбоғли кураш (поясной борбье корэш) федерацияси  таклифига кўра, Жиззах вилояти ҳокимлиги, шунингдек, Ўзбекистон Республикаси бош прократураси, хусусан, Жиззах вилояти прокурори, вилоят кураш федерацияси раиси Исломжон Эргашходжаев саъй-ҳаракатлари билан спортчиларимиздан иборат делегациямиз ушбу жаҳон чемпионатида муносиб иштирок этишди.

Шунингдек, жаҳон чемпионатида Осиё белбоғли кураш конфедрацияси раиси Мўминхўжа Муратов, Ўзбекистон Республикаси бош прократураси ходими Сарвар Эркинов ҳамда Ўзбекистон белбоғли кураш федерацияси раиси Равшан Дастировлар ҳам иштирок этиб, белбоғли курашни янада оммалаштириш хусусида музокоралар ўтказишди. Белбоғли кураш бўйича Хоразм вилояти бош мураббийи, халқаро тоифадаги ҳакам Бекберган Болтаев эса ҳакамлар гуруҳида чемпионатни баҳолаб борди.

Қувонарлиси, ушбу жаҳон чемпионатида 20 га яқин давлатлардан  йиғилган энг сара спортчилар ўртасидаги беллашувларда Усмон Маҳаматов мураббийлигидаги полвонларимиздан 60 кг. да Асадбек Маматалиев кумуш, 65 кг. да Муҳаммадрасул Муҳаммаджонов бронза, 70 кг. да Азимжон Акбаров кумуш, 75 кг. да Сардор Жумабоев кумуш, 80 кг. да Зиёдулла Валижонов бронза 90 кг. да Жаҳонгир Жумабоев кумуш медаль ва 100 кг. да Марат Шахмаев кумуш медални қўлга киритиб, умумжамоа ҳисобида фахрли иккинчи ўринни эгаллашга муваффақ бўлишди.

Қозон шаҳри мезбонлик қилган ёшлар ўртасидаги жаҳон чемпионати доирасида от устида  ва қумда кураш бўйича ҳам беллашувлар ташкил этилди.

Илҳом РАҲМОНОВ тайёрлади