Пойтахтимизда таэквондо (ITF) бўйича Ўзбекистон чемпионати ўтказилмоқда

Жисмоний тарбия ва спорт вазирлиги ҳамда мамлакат таэквондо ITF Миллий ассоциацияси томонидан ташкил этилган мусобақада республикамизнинг барча ҳудудларидан ташриф буюрган 1100 нафар спортчилар иштирок этмоқда.

15 июнь куни пойтахтимиздаги “Саҳоват спорт сервис” мажмуасида мусобақанинг тантанали очилиш маросими бўлиб ўтди.

Тадбирда сўзга чиққан жисмоний тарбия ва спорт вазирининг биринчи ўринбосари Ойбек Қосимов Муҳтарам Президентимиз томонидан жисмоний тарбия ва спортни оммалаштиришга алоҳида эътибор қаратилаётганини таъкидлар экан, ёшларимиз ўртасида таэквондо билан шуғулланувчилар сонини янада ошириш бўйича амалга оширилаётган ишлар ҳақида маълумот берди ва мусобақани расман очиб берди.

Шундан сўнг сўзга чиққан Ўзбекистон таэквондо (ITF) миллий ассоциацияси президенти Лазиз Хасанов эришилган натижаларга тўхталар экан бугунги кунга келиб юртимизда таэквондонинг ушбу йўналиши билан шуғулланувчилар сони 40 минг нафардан ошгани, жорий йилнинг апрель ойида ўтказилган Осиё чемпионатида вакилларимиз 14 та олтин медални қўлга киритишганини айтиб ўтди ҳамда ушбу чемпионат ҳам келгусидаги нуфузли мусобақаларга спортчиларни саралаб олиш мақсадида ташкил этилганлиги маълум қилди.