Президент топшириқлари ижроси юзасидан Жиззахда ҳам тушунтириш ишлари олиб борилди

Сафар аввалида Ишчи гуруҳ аъзолари Жиззах Олимпия ва паралимпия захиралари коллежини кўздан кечирди. Бу ерда мавжуд спорт обектларининг ҳолати ўрганилиб, амалга ошириш режалаштирилаётган қурилиш ишлари лойиҳалари билан танишилди ва келгуси режалар борасида ўзаро фикр алмашилди.

Шундан сўнг вазир бошчилигидаги Ишчи гуруҳ аъзолари Жиззах вилоят футбол маҳорати мактабига ҳам ташриф буюришди ва бу ерда амалга оширилаётган ишлар билан яқиндан танишди. Шу билан бирга ушбу масканда бўлажак футболчилар учун барча шароитларни яратиб бериш лозимлиги уқтирилиб, спорт таълими сифати даражасини яна-да ошириш бўйича зарур тавсиялар берилди.

Маълумки, жорий йил 23-май куни Ўзбекистон Республикаси Президенти Шавкат Мирзиёев раислигида спорт таълимини яхшилаш, иқтидорли спортчиларни саралаш ва уларнинг захирасини яратиш ҳамда мураббийларни тайёрлаш бўйича устувор вазифалар юзасидан видеоселектор йиғилиши ўтказилиб, унда вазирлик зиммасига ҳам бир қатор вазифалар юклатилган эди.

Спортни ривожлантириш вазири Адхам Икрамов Жиззах вилоятига ташрифи доирасида мазкур топшириқлар юзасидан йиғилиш ўтказди. Унда Жиззах вилояти ҳокимининг биринчи ўринбосари Абдували Мустанов ҳам иштирок этди.

Тадбирда давлатимиз раҳбари томонидан соҳа ривожини янги даражага олиб чиқиш борасида белгилаб берилган вазифалар ва уларни амалга ошириш механизми юзасидан вилоятдаги спорт таълими муассасаларининг раҳбарлари, вилоят Спортни ривожлантириш бош бошқармаси ходимлари ва туман бўлимлари вакиллари билан тушунтириш ишлари олиб борилди.

Маълумот учун, Спортни ривожлантириш вазири бошчилигидаги Ишчи гуруҳ ҳудудлар бўйича ўрганиш ишларини давом эттирмоқда.