Қадим Олимпия шаҳарчасида Париж-2024 машъаласи ёқилди + ФОТО

Машъалани ёқиш маросими ҳар доимгидек қадим грек ибодатхонасида ташкил этилди. Танталани маросимда Греция президенти Катерина Сакелларопулу, Халқаро Олимпия қўмитаси президенти Томас Бах, мусобақа ташкилий қўмитаси ва Париж шаҳри мерияси раҳбарлари ва бошқа масъул шахслар иштирок этди.

Режага кўра, машъала эстафетаси Грецияда 11 кун давом этади. Шундан сўнг 26 апрель куни Париж-2024 ёзги Олимпия ўйинларининг ташкилий қўмитаси машъалани 120 ёшли “Le Belem” кемасида Марсель шаҳрига олиб кетади. 8 май санасидан машъала бутун Франция бўйлаб 26 июль – XXXIII ёзги Олимпия ўйинлари стартига қадар айланади.

Машъалани биринчи бўлиб кўтариш бахти сузиш бўйича 2004 йилги Олимпиада чемпиони Лор Манадага насиб этди. Париж-2024 Олимпиадаси 26 июль куни бошланиб, 11 августда якунига етади.