Қамаши туманида спорт байрами

Давлатимиз раҳбарининг 2022 йил 11 апрелдаги "Маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари тўғрисида"ги ПҚ–201-сон қарорларида белгилаб берилган вазифаларнинг ижросини таъминлаш мақсадида "Беш ташаббус олимпиадаси"нинг мавсумий босқичларида минглаб ёшлар маҳорат ва иқтидорларини намойиш этмоқда. Асосийси, жисмоний тарбия ва спортга бўлган оммавийлик ошяпти. 

Мазкур "Беш ташаббус олимпиадаси"нинг жорий йилги биринчи мавсуми яъни, кўчалараро маҳалла мусобақалари босқичи бошланмоқда. 

Хусусан, Қашқадарё вилоятининг Қамаши тумани марказидаги 2-сонли спорт мактабида ҳам "Беш ташаббус олимпиадаси"га старт берилиши ҳамда март ойидан мактаб ўқувчилари ўртасида вилоят ҳокими кубоги учун "Мактаблар лигаси" спорт мусобақасининг сектор босқичи бошланиши муносабати билан тантанали очилиш маросими ташкил этилди.

Қашқадарё вилоят спорт бошқармаси, Қамаши туман ҳокимлиги, Ёшлар ишлари агентлиги туман бўлими, туман мактабгача ва мактаб таълими бўлими, туман биринчи ва 2-сонли спорт мактаби ҳамда бошқа масъул ташкилотлар ҳамкорлигида ўтказилган ушбу тадбирда 400 нафардан ортиқ ўғил-қизлар иштирок этишди.

Тадбирнинг тантанали очилиш маросимида сўз олган Қамаши тумани ҳокими Хуршид Усмонов ҳамда 2-сонли спорт мактаби директори Шербек Соатов "Беш ташаббус олимпиадаси" беллашувлари бошланиши билан барчани қутлаб, иштирокчиларга омад тилашди. 

Шундан сўнг, спорт мактаби тарбияланувчилари ҳамда тумандаги кўплаб маҳалла ёшлари иштирокида футбол, стол тенниси, армрестлинг, волейбол, шахмат, кураш каби спорт турлари бўйича ўзаро беллашувлар ташкил этилди.

Спорт мактаби директори Шербек Соатовнинг таъкидлашича, "Беш ташаббус олимпиадаси" доирасидаги спорт турлари бўйича беллашувлар белгиланган дастур-режага мувофиқ, боқичма-босқич йил давомида ўтказилади ва бунинг учун етарлича шарт-шароитлар мавжуд.

Илҳом РАҲМОНОВ тайёрлади