Қамашида миллий кураш бўйича мусобақа ўтказилди ФОТОРЕПОРТАЖ

Спорт мактаби маъмурияти томонидан ташкил этилган мусобақада Қарши шаҳри, Яккабоғ ва Китоб туманларининг умумий ўрта таълим мактабларидаги кураш тўгаракларида қатнашаётган 260 нафардан зиёд ёш полвонлар жами 20 та вазн тоифасида гиламида ўзаро беллашишди. 

Мусобақа якунида умумжамоа ҳисобида мезбонлар - Қамаши туман БЎСМ-2 жамоаси биринчи ўринни қўлга киритди. Қарши шаҳрининг “Кураш” маркази жамоаси иккинчи, Китоб туман жамоаси эса учинчи ўринни эгаллади. 

Дарҳақиқат, давлатимиз раҳбари 2020 йил 4-ноябрдаги “Кураш миллий спорт турини ривожлантириш ва унинг халқаро нуфузини янада ошириш чора-тадбирлари тўғрисида”ги қарори мардлик, жасурлик, ватанпарварлик, гуманизм ғояларини ўзида мужассам этган миллий спортимиз бўлган курашни оммалаштириш муҳим аҳамият касб этади, - дейди Қамаши туман 2-сонли болалар-ўсмирлар спорт мактабининг “Кураш” бўлими  мураббийи, мусобақа ташкилотчиси Абдулазиз Хурсанов. - Қарор доирасида қабул қилинган “Йўл харитаси” белгиланган чора-тадбирлар эса курашни келгусида Халқаро олимпия ўйинлари дастурига киритишга хизмат қилади.

Ғолибларни спорт мактаби маъмурияти, туман "Маҳалла" хайрия жамғармаси мутахассиси Рустам Эшмаматов, "Улуғбек" маҳалласи раиси ўринбосари Барат Қўчқоровлар қутлаб, уларга диплом, медаль ва эсдалик совғаларини топширди.

Фахриддин Чориев, сайтимизнинг Қашқадарёдаги мухбири