Қамашилик болалар уй шароитида машғулотларга зўр беришмоқда ФОТОГАЛЕРЕЯ

Жумладан, вилоят бошқармаси тасарруфидаги Қамаши туман болалар-ўсмирлар спорт мактаби тарбияланувчилари ҳам уй шароитида масофадан тренерлари кўрсатмаларига амал қилиб, машғулотларни давом эттиришмоқда. 

Туманда ягона бўлган ушбу болалар-ўсмирлар спорт мактаби тарбияланувчиларининг кўпчилиги миллий ва халқаро мусобақаларнинг совринларини қўлга киритишга муваффақ бўлишган.  

Мазкур спорт мактабида бокс, дзюдо, таэквондо (ИТФ), таэквондо (ВТФ), кураш, белбоғли кураш, қўл тўпи, волейбол, қўл жанги, енгил атлетика, футбол, стол тенниси, бадиий гимнастика, оғир атлетика, шахмат-шашка каби жами ўн бешта спорт тури мавжуд бўлиб, 1565 ўғил-қиз 35 нафар тажрибали мураббйилар қўл остида маҳоратларини ошириб боришади.   

Спорт мактаби директори Дилшод Бердиевнинг таъкидлашича, ўғил-қизларнинг ўзлари танлаган спорт турлари бўйича эмин-эркин шуғулланишлари учун шарт-шароитлар етарлича яратилган. Мақсад – оммавийликни таъминлаб, спортга ошно болаларни катта спорт сари етаклаш ва терма жамоаларга муносиб издошлар тайёрлаш.   

Юксак орзулари сари одимлаётган спорт мактаби ёшлари карантин сабаб бугун уйда. Бироқ машғулотлар режага кўра масофадан давом эттирилмоқда. 

Илҳом РАҲМОНОВ тайёрлади, ўз мухбиримиз