Қашқадарё ва Сурхондарё полвонлари кураш семинарида қатнашишди

Қарши шаҳрида “Кураш Олимпиада сари, гендер тенглик" мавзусида ўтган семинар тренингга нафақат вилоятдаги мутахассис ва ишқибозлар, балки қўшни Сурхондарё вилояти вакиллари ҳам жалб этилди.

Икки вилоят кураш мутахассислари иштирокидаги семинарда миллий спортимиз кураш бўйича амалга оширилаётган ишлар, унинг техник ва тактик тамойиллари, мусобақалар жараёнидаги вазиятлар, ўқув-машғулотларни ташкил этишда кураш қоидаларига, миллий анъаналарга амал қилиш жиҳатлари кенг муҳокама қилинди. Фахрий полвонлар Абдурашид Мирзаев, Остон Чўлиев, Олим Хайитов, жаҳон чемпиони Бахром Авазов, Ўзбекистон кураш федерацияси бош котиби Алишер Эшонқулов семинар тингловчиларининг саволларига жавоб беришди. Экспертларнинг фикр-мулоҳазалари тингланди.

Муҳими, Қашқадарё ва Сурхондарё вилоятлари ўртасида курашнинг оммалаштириш, мусобақалар ташкил этиш, ҳамкорлик қамровини давлатимиз раҳбари томонидан имзоланган «Маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари тўғрисида»ги қарор асосида ҳам кенгайтириш бўйича келишувга эришилди.

Семинар ҳар томонлама ишчан руҳда ўтди. Унинг якунида иштирокчиларга кураш тарихи, унинг спорт қонун-қоидаси муаллифи Комил Юсупов ҳақидаги ведио лавҳалар намойиш этилди. 

“Кураш Олимпиада сари, гендер тенглик" мавзусидаги семинар-тренингда фаоллик кўрсатган ёшлар ташкилотчилар томонидан диплом ва совғалар билан тақдирланди.

Тўлқин Рўзиев.