Қашқадарёдаги оммавий спорт мусобақаларида 4 мингга яқин аҳоли қатнашди

Қарши шаҳрида Қашқадарё вилоят ҳокимлиги, вилоят давлат хавфсизлик хизмати, вилоят жисмоний тарбия ва спорт бошқармалари ҳамда бир қатор мутасадди ташкилотлар ташаббуси билан аҳоли, айниқса ёшларни турли ёт ғоялардан асраш, шунингдек, миллий қадриятларимизга ҳурмат ва садоқат руҳида тарбиялаш мақсадида “Биз буюк юрт фарзандлари – терроризм, экстремизм ва миссионерликка қаршимиз” шиори остида мусобақа ўтказилди. 

Нуронийлар ўртасида спортнинг шахмат тури бўйича, ёшлар ўртасида эса сузиш бўйича, ўрта махсус касб-ҳунар таълими ўқувчилари ўртасида стол тенниси ҳамда спринт (эстафета) мусобақалари, олий таълим муассасалари талабалари ўртасида армрестлинг ва кураш, тиббиёт ходимлари ўртасида футбол ҳамда ёшлар ўртасида марафон мусобақалари ташкил этилди. 

Шунингдек, “Отам, онам ва мен – спортчилар оиласимиз” шиори остида қувноқ стартлар мусобақаси ҳам кўтаринки руҳда ўтказилди.

Мазкур мусобақаларда 4000 (шундан 1000 нафардан ортиғини хотин-қизлар ташкил этди) нафарга яқин турли ёшдаги аҳоли иштирок этди ва спортда ҳам ўз иқтидорларини намоён қилди.

Қизғин вазиятларга бой бўлган мусобақалар якунига кўра ғолиблик ҳамда совринли ўринларни қўлга киритган иштирокчилар Қарши шаҳар ҳокимлиги, вилоят жисмоний тарбия ва спорт бошқармаси, вилоят халқ таълими бошқармаси, Ўзбекистон ёшлар иттифоқининг вилоят кенгаши ҳамда бошқа мутасадди ҳамкор ташкилотлар томонидан диплом, медаль, кубок ва қимматбаҳо эсдалик совғалари билан тақдирланишди.