Қиличбоз қизларимиз жаҳон Кубоги босқичида 2 та медалга эга чиқишди

Қизлар ўртасида ўтказилаётган мусобақанинг яккалик йўналишида ғолиб ва совриндорлар аниқланди. 

Қувонарлиси, ҳамюртимиз Гулистан Пердибаева бронза медалини қўлга киритди. Ярим финалгача муваффақиятли иштирок этган Ханчжоу-2022 ёзги Осиё ўйинлари ғолиби финал остонасида ёшлар ўртасидаги жаҳон чемпиони хитойлик Симао Панга 14:15 ҳисобида имкониятни бой берди ва учинчи ўринни эгаллади.

Бугун эса қизлар ўртасидаги жамоавий дастурда Ўзбекистон ёшлар терма жамоаси кумуш медалларга эга чиқишди.

Чорак финалда Таиланд, ярим финалда Гонконг жамоаларини мағлуб этган юртдошларимиз финалда мезбонларга 39:45 ҳисобида имкониятни бой беришди. Беллашувларда Гулистан Пердибаева, Фернанда Эррера, Самира Шокирова ҳамда Аякоз Жумамуратова юртимиз шарафини ҳимоя қилдилар.