Қиличбоз қизларимиз Осиё чемпионатининг жамоавий баҳсларида совриндор бўлишди

Бунгача ўсмирлар ўртасидаги баҳсларда сабля йўналишида Шерзод Мамутов, шунингдек жамоавий баҳсларда ўғил болалар ўртасида йигитларимиз бронза медалига эга чиқишганди. 

Бугун ёшлар ўртасидаги беллашувлар якунланди. Қувонарлиси, сабля йўналишининг қизлар ўртасидаги жамоавий баҳсларида терма жамоамиз аъзолари бронза медалини қўлга киритишди. Ҳамюртларимиз чорак финалда таркибида собиқ жаҳон чемпиони бўлган Сингапур терма жамоасини 45:44 ҳисобида мағлуб этишди. Ярим финалда эса Жанубий Корея вакилларига 35:45 ҳисобида имконият бой берилди. Шу орқали спортчиларимиз бронза медалига сазовор бўлишди. Ярим финалда мағлуб бўлган қизларимиз иккинчи жуфтликда Хитойга ютқазган япониялик рақибаларига тўқнаш келишди ва 45:31 ҳисобида ғалаба қозонишди. Мусобақа регламентига кўра, ярим финалда мағлуб бўлган жамоалар бронза медалини қўлга киритишади. Японияга қарши баҳс орқали эса қўшимча рейтинг очколари ишлаб олинди. Қайд этиш лозимки, Япония мусобақада биринчи рақам остида сараланган терма жамоа ҳисобланади.

Чемпионат давомида юртимиз шарафини Зайнаб Дайибекова, Айсулу Уснатдинова, Севинч Исмоилова каби спортчиларимиз ҳимоя қилишди.