Қиличбозлик. Паола ва бошқа рақибларини мағлуб этган Дайибекова лицензион турнирда қатнашадиган бўлди + ФОТО

Кеча мазкур турнир олдидан ички саралаш баҳслари якунланди. Бу ҳақида МОҚ матбуот хизмати хабар берди. 

Хабар берганимиздек, мураббийлар штаби энг кучли рақобат юзага келган аёллар ўртасидаги сабля йўналишида ана шундай мусобақа ўтказишга қарор қилган. 30 нафардан ортиқ саблячи қизлар рақобатида Зайнаб Дайибекова, Севинч Исмоилова, Паола Плиеого ҳамда Яна Обвинцева ярим финалга етиб келишди.

Финал учун кечган баҳсда Зайнаб Дайибекова Паола Плиегони 15:9 ҳисобида мағлубиятга учратган бўлса, иккинчи жуфтликда Севинч Исмоилова Яна Обвинцевани доғда қолдирди. Ҳал қилувчи беллашувда эса Дайибекова ўз устунлигини намойиш қилиб, лицензион мусобақада юртимиз шарафини ҳимоя қилиш имкониятини қўлга киритди.

Беллашувларни МОҚ ҳамда Ўзбекистон қиличбозлик федерацияси раиси Рустам Шоабдураҳмонов ҳамда Пан-Америка қиличбозлик конфедерациясида раҳбарлик қилаётган ҳамюртимиз Виталий Логвин ҳам кузатиб боришди ва федерация мутасаддилари билан мазкур мусобақага олиб борилаётган тайёргарлик масалалари юзасидан суҳбатлашишди.

Эслатиб ўтамиз, бўлажак лицензион мусобақада ҳар бир йўналишда олтин медални қўлга киритган қиличбозларгина Токио-2020 Олимпия ўйинларига йўлланмани қўлга киритишади.