Қиличбозлик. Пойтахтимизда "Хотира ва қадрлаш куни"га бағишланган турнир старт олди

Пойтахтимиздаги "Пахтакор" стадионида жойлашган қиличбозлик залида "9-май Хотира ва қадрлаш куни” муносабати билан Ўзбекистон қиличбозлик Федерацияси ҳамда Ўзбекистон Республикаси Жисмоний тарбия ва спорт вазирлигининг спорт ва оммавий жисмоний тарбия тадбирларининг 2019 йил учун календарь режасига мувофиқ жорий йилнинг 6-8 май кунлари қиличбозлик бўйича Республика Очиқ турнири ўтказилмоқда. 

Мазкур мусобақаларда мамлакатимиз вилоятлари, Қорақалпоғистон Республдикаси ҳамда қўшни Қозоғистондан ташриф буюрган жами 250 нафар спортчи қатнашмоқда. Ўзбекистон қиличбозлик Федерацияси томонидан “Хотира ва қадрлаш куни”ни муносиб нишонлашдан кўзлаган бош мақсад – тинчлигимиз посбонлари бўлган Ватан ҳимоячиларини хотирлаш, орамиздаги спортга фидойи инсонларнинг қадрига етиш, урушни қоралаш, тинч-осойишта яшаётганимиз, турмуш фаровонлигини таъминлаш учун тер тўкиб, унумли меҳнат қилаётганимизнинг шукронасини қилишдек эзгу фазилатларни ёш спортчилар онгу-шуурига сингдиришдан иборат. Ишонамизки, бу каби мусобақалар ҳар бир ёш спортчини маънан рағбатлантиради, уни яшашга, яратишга, элу юртга садоқат ва қатъият билан хизмат кўрсатиб, жаҳон ареналарида Ватанимиз шарафини муносиб ҳимоя қилишга ундайди.

Ўзбекистон қиличбозлик федерацияси матбуот хизмати