Қиличбозлик. Шерзод Мамутов Россиядаги мусобақада совриндор бўлди

Ушбу мусобақада Россия ва Қозоғистон спортчиларидан ташқари шу кунларда Новосибирск шаҳрида ўқув-машғулот йиғинлари ўтказаётган ўзбекистонлик ёш спортчилар ҳам иштирок этишди.

Ўғил болалар ўртасидаги турнирда 133 нафар, қизлар ўртасидаги баҳсларда эса 99 нафар спортчи қатнашди.

Қувонарлиси, ўғил болалар ўртасидаги баҳсларда юртимиз шарафини ҳимоя қилган Шерзод Мамутов ярим финалгача етиб борди ва бронза медалига сазовор бўлди. Терма жамоамизнинг бошқа аъзоси Бобур Расулов ҳам мусобақада энг кучли 8 нафар қиличбоз орасига киришга муваффақ бўлди.

Қизлар ўртасидаги беллашувларда эса Зайнаб Дайибекова 1/8 финалгача етиб борди.

Қайд этиш лозимки, Россияда ушбу мусобақа якунларига кўра мамлакат терма жамоаси таркиби шакллантирилади ва ушбу мусобақада муваффақиятли қатнашган россиялик ёш қиличбозлар терма жамоа сафида жаҳон ва Европа чемпионатларида иштирок этишлари мумкин бўлади. Маълумот учун, 13-маротаба ташкил этилган ушбу мусобақада илк маротаба хорижий қиличбоз, яъни Шерзод Мамутов совриндорлар қаторидан ўрин олди.