Қиличбозлик. Тошкентда ўтказиладиган халқаро турнирлар олдидан матбуот анжумани бўлиб ўтди

Аввалига 5-8 сентябрь кунлари "Сателлит" халқаро турнири бўлиб ўтса, 9-10 сентябрда Марказий Осиё қиличбозлик Конфедерацияси очиқ чемпионати ташкил этилади. 

Бугун Республика ихтисослаштирилган гимнастика саройида ушбу мусобақалар олдидан матбуот анжумани ташкил этилди. Унда Ўзбекистон қиличбозлик федерацияси вакиллари ҳамда оммавий ахборот воситалари ходимлари иштирок этишди. Анжуман аввалида Ўзбекистон қиличбозлик федерацияси бош котиби Гулнора Саидова ўтказиладиган мусобақалар ҳақида маълумот берди. Шунингдек, турнирларнинг ташкилий жиҳатлари, рейтинг тизими ҳақида гапириб ерди. 

Шундан сўнг Ўзбекистон қиличбозлик федерацияси раисининг ўринбосари Геннадий Пелих ўз фикрларини билдирди. 

"Федерацияда катта ҳажмдаги иш олиб борилмоқда. Бунинг самараси ўлароқ, Ўзбекистонга ушбу рейтинг турнирини ташкил этиш имконияти берилди. Ушбу мусобақалар муҳим рейтинг очколарини тақдим этади. Бундан ташқари, келаси йили ташкил этиладиган лицензион мусобақага тайёргарлик вазифасини ҳам бажаради.

Турнирда иштирок этиш учун АҚШ, Италия, Британия, Россия, Бразилия, Туркия ва бошқа мамлакатлардан қиличбозлар ташриф буюришади. Биз келажакда ҳам шундай нуфузли мусобақаларга мезбонлик қилишни мақсад қилганмиз", - деди Геннадий Пелих. 

Тадбир давомида Ўзбекистон терма жамоаси мураббийи Игорь Чикинёв, Халқаро тоифадаги ҳакам Аида Ҳасанова ҳам журналистлар томонидан берилган саволларга жавоб беришди.