Қорақалпоғистонлик стол теннисчилар юқори маррани кўзламоқда

Хусусан, қишлоқ жойларда ҳам спортнинг ушбу тури бўйича тўгараклар ташкил этилган бўлиб, уларда шуғулланаётган ёшлар учун барча шароитлар яратилган.
Жумладан, Ўзбекистон стол тенниси федерацияси Қорақалпоғистон бўлими бугунги кунда мазкур спорт турини янада ривожлантириш бўйича бир қатор самарали ишларни амалга оширмоқда. Ҳудуддаги болалар ва ўсмирлар спорт мактабида 15 та, ихтисослаштирилган болалар-ўсмирлар спорт мактаблари ва ихтисослаштирилган Олимпия захиралари мактаб-интернатида биттадан спорт тўгараклари фаолият олиб бормоқда. Ушбу тўгаракларда 60 нафар мураббий жами 2173 нафар ўсмирлар, ёшлар ва катталарга стол теннисининг сир-синоатларини ўргатиб келмоқда.

Ўзбекистон стол тенниси федерацияси Қорақалпоғистон ва вилоят бўлимларининг фаолиятини самарали ташкил этиш, уларнинг моддий-техник базасини мустаҳкамлаш, малакали кадрлар билан таъминлаш, қишлоқ, туман, шаҳар ва вилоятларда мусобақаларни юқори савияда ўтказиш орқали спортчи ва мураббийларнинг тажрибаси ва маҳоратини ошириб боришга доир ишларни янада самарали ташкил этиш юзасидан доимо ўз тавсияларини бериб келмоқда.

Шунингдек, давлатимиз раҳбари Шавкат Мирзиёевнинг 2017 йил 9 мартдаги қабул қилинган «Ўзбекистон Республикаси спортчиларини Токио шаҳрида (Япония) бўлиб ўтадиган ХХХII ёзги Олимпия ва ХVI Паралимпия ўйинларига тайёрлаш»га оид қарори мазкур вазифаларни амалга оширишда муҳим омил бўлмоқда.

– Қарорда юқори салоҳиятли спортчи ва мураббийларни ҳар томонлама қўллаб-қувватлаш, олимпиячиларимиз захирасини бойитишга алоҳида эътибор қаратилган, – дейди Ўзбекистон стол тенниси федерацияси Қорақалпоғистон бўлими ижрочи директори Мурат Измуратов. – Республикамизда стол тенниси бўйича ўқув-машғулот жараёнларини энг замонавий талаблар даражасида ташкил этиш, жисмоний, ижтимоий-психологик, тиббий-биологик тайёргарликни яхшилаш, болалар ва ўсмирлар ўртасида ушбу спорт турини янада оммалаштириш бўйича кенг кўламли вазифалар белгиланган. Бизга ушбу вазифаларни мукаммал бажаришимизга барча имкониятларни яратиб бераётган, Жисмоний тарбия ва спорт вазирлиги ҳамда Миллий олимпия қўмитасидан миннатдормиз.

Бугун Қорақалпоғистонда ўз олдига юқори марраларни забт этишдек мақсадларни қўйган ёшлари кўп. Айниқса, стол тенниси бўйича Лаззат Назирбоев, Муҳриддин Ражабов, Шерзод Йўлдошев, Мусо Танатаров, Дилшод Ражабов, Дамир Жузбанов, Азиза Аскербоева, Гулноз Айназарова, Умида Собирова каби ёш истеъдод эгалари мамлакат чемпионатларида доимо шоҳсупанинг юқори поғоналаридан жой олиб келади.

– Спортчиларимизнинг маҳоратини оширишда, федерациямиз томонидан биз мураббийларга ўтказилаётган турли хил семинарлар муҳим аҳамият касб этмоқда, – дейди стол теннис бўйича Қорақалпоғистон жамоаси бош мураббийи Бегдияр Сарибоев. – Стол тенниси қорақалпоғистонлик ёшларнинг энг севимли спорт турларидан бирига айланди. Шу сабабли ҳам тўгаракларда мазкур спорт тури билан шуғулланувчилар сони кўпаймоқда. Шунингдек, терма жамоа сафида иқтидорли спортчиларни саралаш ишлари тизимли равишда йўлга қўйилган. Спорт мактаблари, туман ва шаҳар биринчиликларида юқори натижаларни қўлга киритган спортчилар, жамоага қабул қилинади.

Дарҳақиқат, мамлакатимизда кўплаб ёшлар стол теннисига ошно бўлмоқда. Ана шундай умидли спортчиларимиздан бири Манғит шаҳрининг Амударё туманида 2004 йили дунёга келган Лаззат Назирбоевдир.

Лаззатнинг отаси Абдулла ака ўғлини спортга бўлган қизиқиши сабаб, жароҳат кам олувчи ва унинг ҳар томонлама комил инсон бўлиб вояга етиши учун стол тенниси тўгарагига олиб боради. Ёш теннисчимиз мураббийларнинг кўрсатмаларини тезда ўзлаштиради. Болалар ўртасида ўтказилган турли мусобақаларда маҳоратини оширади ва 2018 йили Нукус шаҳрида 2004 йилда туғилган ва ундан кичик ўғил болалар ўртасида ўтказилган Ўзбекистон чемпионатида бронза медалини қўлга киритади. Орадан бир йил ўтиб, Жиззах шаҳри мезбонлик қилган мамлакат биринчилигида 16 ёшгача бўлган теннисчилар ўртасидаги баҳсларда барча рақибларини енгиб, Қорақалпоғистон терма жамоасига олтин медални тақдим этади.
Ҳозирда Нукус ихтисослаштирилган олимпия захиралари мактаб-интернати стол тенниси бўйича 9-синф ўқувчиси бўлган Л.Назирбоев машғулотларини мунтазам олиб бормоқда. Умид қиламизки, Лаззат келгусида мамлакат шарафини янада юксак марраларни забт этади.

– Ўз ёш тоифамда Ўзбекистон чемпиони деган номга сазовор бўлишдек, бахтга эришганимдан хурсандман. Бу ғалабам замирида, Ўзбекистон стол тенниси федерацияси томонидан яратиб берилган шароитлар, мураббийларимнинг аниқ кўрсатмалари ва ота-онамнинг дуоси ётибди. Ҳозирда карантин ҳолати жорий этилган бўлсада, уйимда масофавий тарзда давом эттирмоқдаман. Биз ёшларга шундай имкониятларни яратиб бераётган Президентимизга миннатдорчилик билдираман ва келгусида мамлакатимиз байроғини кўкларга кўтариш учун бор-куч ғайратимни ишга соламан.

Ўзбекистон стол тенниси федерацияси матбуот хизмати