Қутлуғ 60 ёшингиз муборак, Анатолий Касимович!

Анатолий Касимович бугун қутлуғ 60 ёшини қарши олди. Тажрибали мутахассис сўнгги йилларда аёллар кураши жамоамизнинг халқаро мусобақаларда эришаётган ютуқларига ўз хиссасини қўшиб келмоқда. Мураббий терма жамоанинг ҳар бир аъзосида ўзига, беллашувларда ғалабага бўлган ишончини уйғота олди.    

Яқинда 1 октябрь – Ўқитувчи ва мураббийлар куни муносабати билан мамлакатимизда таълим тизимини халқаро стандартлар асосида ривожлантириш, соҳага доир ислоҳотларни муваффақиятли амалга ошириш, ўқув-тарбия жараёнига илғор хорижий тажрибалар, инновацион педагогик ва ахборот-коммуникация технологияларини кенг жорий этиш ишларига қўшган муносиб ҳиссаси, ўқувчиларга илм-фан асослари ва замонавий касб-ҳунарларни ўргатиш, уларнинг интеллектуал салоҳиятини юксалтиришдаги катта хизматлари, юқори малакали кадрларни тайёрлаш, ҳар томонлама соғлом ва баркамол авлодни вояга етказиш, ёшларни она Ватанга муҳаббат, истиқлол ғояларига садоқат руҳида тарбиялаш йўлидаги ибратли фаолияти ҳамда ижтимоий ҳаётдаги фаол иштироки учун бир гуруҳ юртдошларимиз ҳукуматимиз томонидан фахрий унвон, орден ва медаллар билан мукофотланган эди.

Қувонарлиси, улар сафида тажрибали мураббийимиз Анатолий Ибрагимов ҳам бор эди. Спорт яккакурашлари бўйича Республика олий спорт маҳорати мактабининг эркин кураш бўйича мураббийи Анатолий Касимович Президент фармонига биноан "Дўстлик" ордени билан мукофотланганди.

Фурсатдан фойдаланиб, Ўзбекистон Спорт курашлари ассоциацияси раҳбарияти, мураббийлар ва курашчилар номидан бугун қутлуғ 60 ёшини нишонлаётган Анатолий Касимовични муборакбод этамиз. У кишига узоқ умр, сиҳат-саломатлик, оилавий бахт тилаймиз.