Расман! BMF камари учун кечадиган Холлоуэй - Оливейра жанги тасдиқланди + ПОСТЕР

7 март куни АҚШнинг Невада штати Лас-Вегас шаҳрида UFC 326 турнири бўлиб ўтади. Оқшомнинг асосий жанги енгил вазн тоифасида BMF камари соҳиби америкалик Макс Холлоуэй бразилиялик собиқ UFC чемпиони Чарльз Оливейрага қарши октагонга чиқади. Ушбу тўқнашув турнирнинг асосий жанги бўлади.

Америкалик ва бразилиялик ўртасидаги жанг уларнинг биринчи учрашувидан деярли ўн бир йил ўтиб, реванш мақомида бўлади. 2015 йил август ойида Оливейра биринчи раунддаёқ жароҳат олиб, жангни давом эттира олмаган ва техник нокаутли ғалаба Максга тақдим этилган эди.

Ўшандан бери 34 ёшли Холлоуэй ва 36 ёшли Оливейра UFC чемпионлигини қўлга киритди. Уларнинг жанг олдидан ташкилотдаги умумий ғалабалари сони 48 тани ташкил қилмоқда. Макс Холлоуэй учун бу ўтган йилнинг апрель ойида Жастин Гэтжидан тортиб олинган ва июль ойида Дастин Порега қарши жангда ҳимоя қилган BMF камарининг иккинчи ҳимояси бўлади. 

Дивизион рейтингида иккинчи ўринни эгаллаб турган Чарльз Оливейра шу йилнинг июнь ойида бўш қолган чемпионлик камари учун кечган жангда Илия Топурияга нокаут билан мағлуб бўлганди. У шундан сўнг тезда тикланди ва октябрь ойида Рио-де-Жанейрода бўлиб ўтган турнирда Матеуш Гамротни бўғиш усули эвазига таслим этди.