Расман: Футболда инқилоб! Энди оғзини ёпиб ҳақорат қилган ва майдонни тарк этган футболчилар четлатилади

Ушбу янги қоидалар ЖЧ-2026 турниридан бошлаб қатъий қўлланилади.

Янги қоидаларга кўра:

Оғизни ёпиш тақиқланади: Конфликт вақтида рақиб футболчисига қарата оғзини қўли ёки либоси билан ёпиб, нимадир деган ўйинчи тўғридан-тўғри қизил карточка билан жазоланиши мумкин. Бу чора майдондаги камситиш ва ҳақоратларга қарши курашиш мақсадида жорий этилмоқда.

Майдонни тарк этиш учун жазо: Ҳакам қарорига норозилик сифатида майдонни ўзбошимчалик билан тарк этган футболчилар ва уларни бунга ундаган расмий шахслар (мураббийлар) четлатилади.

Техник мағлубият: Агар жамоанинг норозилиги сабабли ўйин тўхтаб қолса, ўша жамоага автоматик равишда техник мағлубият ёзилади.

Бунга нима сабаб бўлди?

Яқинда содир бўлган иккита йирик воқеа ушбу қарорларнинг тезлашишига сабаб бўлди. Биринчидан, "Бенфика" вингери Жанлука Престианни ЕЧЛ доирасида "Реал" юлдузи Винисиусга қарата оғзини ёпиб, "гомофобик ҳақоратлар" ишлатгани учун 6 та ўйинга дисквалификация қилинди.

Иккинчидан, Африка Кубоги финалида Сенегал терма жамоаси ҳакам томонидан Браим Диасга ишлатилган фол учун белгиланган пенальтига норозилик сифатида майдонни тарк этганди. Оқибатда Сенегалга техник мағлубият (0:3) ёзилди.