Равшан Ҳайдаров: "Жанубий Кореяга қарши ўйинга тайёрмиз"

Чорак финалда Японияни 4:0 ҳисобида мағлуб этган Ўзбекистон U-23 терма жамоаси эртага финалга чиқиш учун Жанубий Кореяга қарши баҳс олиб боради. Бугун ўйиндан олдинги матбуот анжумани ташкил этилди.

Терма жамоамиз бош мураббийи Равшан Ҳайдаров ўйиндан олдин шундай деди:

- "Айни пайтга келиб бизда таркиб бўйича умуман муаммо йўқ. Барча футболчилар эртага бўлиб ўтадиган учрашувга тайёр. Биз жисмоний, тактик ва руҳий жиҳатдан ҳам мазкур баҳсга тайёрмиз. Ўйлайманки, эртага энг яхши ўйинимизни намойиш этамиз".

- "Ҳозир Жанубий Корея билан бир хил вазиятдамиз, чунки иккала жамоа ҳам мусобақада тўрттадан ўйин ўтказди. Японияга қарши йирик ғалаба ўйинчиларимизнинг кайфиятини кўтариб юборди. Лекин биз биламизки, Жанубий Корея кучли жамоа. Аммо уларни ҳам енгишга ҳаракат қиламиз".