Равшан Рўзиқулов: "Қўшма йиғин ҳар икки томон учун ҳам фойдали бўлди"

Хабар берганимиздек, Равшан Рўзиқулов мураббийлигидаги "классиклар"имиз икки ҳафта давомида Қирғизистон терма жамоаси билан биргаликда айнан "Янгиобод"да ташкил этилган қўшма машғулотда иштирок этишаётганди. Кеча ушбу қўшма йиғин якунига етди. Биз терма жамоа бош мураббийи Равшан Рўзиқуловнинг халқаро машғулот якунлари бўйича фикрлари билан қизиқдик. 

"Ўзбекистон ва Қирғизистон юнон-рум кураши терма жамоаларининг икки ҳафталик қўшма машғулоти ҳар икки томон учун ҳам фойдали бўлди. Қўшниларимиз Тошкентга кучли таркиб билан келишганди. Кеча Тошкентга жўнаб кетишлари олдидан суҳбатлашдик. Машғулотлардан кўнгиллари тўлгани ва хурсанд кайфиятда Бишкекка қайтаётганларини айтишди. Энг муҳими, қўшма машғулотимиз жароҳатларсиз ўтди. Йиғин иккала жамоа учун ҳам Қозоғистонда ўтадиган Токио Олимпиадасининг Осиё лицензион турнирига тайёргарлик вазифасини ўтаб берди. Ҳозир 3 та йўлланмамиз бор ва қолган шунча лицензияни Алматидаги турнирда қўлга киритишга ҳаракат қиламиз. Қозоғистонга борадиган таркибни аниқлаб олганмиз. Улардан умидимиз катта. Ўзлари ҳам масъулиятни ҳис қилиб туришибди. Эндиги режаларга тўхталадиган бўлсам, "Янгиобод"даги машғулотлар 27 мартгача давом этади ва кейин Тошкент қайтиб, тайёргарликнинг сўнгги босқичини "Динамо"да ўтказамиз", - деди Р.Рўзиқулов. 

Маълумот учун, 2019 йил Қозоғистоннинг Нур-Султан шаҳри мезбонлик қилган жаҳон чемпионатида юнон-рум курашчиларимиздан Элмурат Тасмурадов, Жалгасбай Бердимуратов ва Рустам Ассакалов Токио Олимпиадаси йўлланмасини қўлга киритишганди.