Рейтинги йўқ 45 ёшли Винус Уильямс 21 йиллик рекордни такрорлади

Турнир ташкилотчилари томонидан WTA рейтингида ўрни бўлмаган Уильямсларнинг тўнғичига асосий тўрда тўғридан-тўғри қатнашиш учун имтиёзли вайд-кард йўлланмаси тақдим этилганди. 

Тўқсон олти дақиқа давом этган баҳсда Винус дунёнинг 35-ракеткаси бўлиб турган ватандоши Пейтон Стёрнсни 6/3, 6/4 ҳисобида мағлубиятга учрата олди. Бу америкалик теннисчиларнинг ўзаро ўтказган илк учрашуви бўлди. Уильямс баҳс давомида 9, Стёрнс 3 та эйс зарбасини амалга оширган. Иккала теннисчи ҳам 4 тадан қўшхатога йўл қўйди. 

"Катта Дубулға" турнирларининг 7 карра ғолиби 21 йиллик рекордни такрорлади. У WTA турнири доирасидаги учрашувда ғалаба қозонган энг ёши катта иккинчи теннисчи бўлди. 47 ёшли Мартина Навратилова 2004 йилги мавсум Уимблдон турнирининг биринчи даврасида Каталина Кастанони мағлубиятга учратган эди. 

Бу Винус Уильямс икки йиллик танаффусдан сўнг қўлга киритган илк ғалабаси бўлди. Америкалик теннисчи 2023 йилнинг август ойида Цинцинатти турнирининг биринчи босқичида Вероника Кудерметовадан устун келганди. Энди Винус Вашингтон турнирининг иккинчи даврасида польшалик Магдалена Френхга қарши кортга чиқади.