18 окт 14:20
Янгиликлар

Бокс/ММА

Ричард Торрес навбатдаги жангини Мексикада ўтказади + ПОСТЕР

Ҳаваскор боксда Олимпия ўйинлари совриндори, Баҳодир Жалоловни қийнаб қўйган рақибларидан бири Ричард Торреснинг навбатдаги жанг тафсилотлари маълум бўлди.

Америкалик 26 ёшли чарм қўлқоп устаси 15 ноябрь куни Мексикада ўтказиладиган проф бокс турнирида чехиялик 27 яшар Томаш Салека (23-7, 14 КО)га қарши рингга кўтарилади. Ушбу бокс оқшоми Zanfer ва Top Rank промоутерлик компаниялари томонидан ташкил этилмоқда.

Мағлубият ва муроса нималигини билмай келаётган Ричард Торрес яқинда IBF чемпионлик камари учун даъвогарлар жангида Фрэнк Санчесга қарши рингга чиқишни рад этганди. Бундан кўриниб турибдики, Торреснинг мақсади - нуфузлироқ камарлар.

Ацтеклар юртидаги турнирнинг асосий жангида ярим енгил вазнда WBO чемпиони, мексикалик Рафаэль Эспиноса даъвогар Арнольд Хегайга қарши рингга чиқади. Шунингдек, ушбу бокс кечасида америкалик таниқли жаҳон чемпиони Фернандо Варгаснинг 21 ёшли ўғли Эмилиано Варгас (15-0, 13 КО) ҳам жанг ўтказади. Кичик Варгаснинг рақиби Жонатан Монтрел (19-3, 13 КО) бўлади.