Рим WTA 1000 турнири бош соврини кимга насиб этди?

Ҳал қилувчи финал учрашувида сайёрамизнинг биринчи ва иккинчи ракеткалари - польшалик Ига Свёнтек ҳамда беларуслик Арина Соболенко ўзаро тўқнаш келишди. Бир соату 29 дақиқа давом этган баҳсда Свёнтек рақибасини бироз кутилмаганда ортиқча қийинчиликсиз мағлубиятга учратди - 6/2, 6/3. 

Теннисчиларнинг ўзаро учрашувларида Свёнтек катта фарқ билан олдинда бормоқда - 8:3. Ига финалда 1, Арина 2 та эйс зарбасини амалга оширган. Қўшхатолар ҳам худди шу кўринишда Соболенко "фойдаси"га бўлди - 2 га 1. Брейклар бўйича мутлақ устунлик чемпион томонда - 4 га 0!

Шу тариқа, Ига Свёнтек фаолиятидаги 21-совринни қўлга киритди. Унинг WTA 1000 тоифасига кирувчи чемпионлик титуллари сони 10 тага етди. Шулардан 4 тасини у шу йилнинг ўзида қўлга киритган. Польшалик теннис маликаси Рим WTA 1000 турнирида учинчи бор чемпион бўлди. У 2021 ва 2022 йилларда ҳам бош соврин соҳибасига айланган эди. 

Internazionali BNL d'Italia турниридаги муваффақиятли иштирок Свёнтекка 1000 рейтинг очкоси ҳамда 699,690 евро мукофот пули тақдим этди.