US Open 2026. Аёллар ўртасида мусобақа чемпиони аниқланди. Ғолиба даҳшатли суммага эга чиқди

Яккалик баҳсларининг ҳал қилувчи финал учрашувида дунёнинг биринчи ракеткаси ва шу билан бирга амалдаги чемпиони бўлиб келган беларуслик Арина Соболенко WTA рейтингида иккинчи поғонадан жой олган қозоғистонлик Елена Рибакинага қарши кортга чиқди. 

Икки соату 22 дақиқа давом этган учрашувда Рибакина рақибасини 6/4, 5/7, 6/2 ҳисобида мағлубиятга учратиб, US Open-2026 чемпионига айланди. Елена теннис маликаларининг ўзаро учрашувлари ҳисобини бироз қисқартиришга муваффақ бўлди - 8:10. Яна иккита ғалабадан кейин қозоғистонлик теннисчи мувозанатни тиклаб қўяди. Бу йилги мавсумда у иккинчи маротаба Соболенкони таслим этди.  

Соболенко финал баҳси давомида 6, Рибакина 11 та эйс зарбасини амалга оширди. Қўшхатолар Еленада биттага кўпроқ бўлди - 4 га 3. Брейклар бўйича эса табиийки, ён қўшнимиз 3 га 1 кўринишида устунликка эришди.

Шу тариқа, Елена Рибакина фаолиятидаги учинчи "Катта Дубулға" турнири чемпионлигини қўлга киритди. У янгиланган WTA рейтингида биринчи ўринга кўтарилиб олади. Беларуслик теннисчининг деярли 100 ҳафталик пешқадамлигига барҳам берилди. 

Елена икки ҳафталик меҳнатидан 2000 рейтинг очкоси ҳамда 5,5 млн АҚШ доллари миқдорида мукофот пулини қўлга киритди. Чемпионлик билан бирга дунёнинг биринчи ракеткаси мақомини ҳам бой берган Арина Соболенко эса 2,8 млн доллар ҳамда 1300 рейтинг очкосига эга чиқди.