"Ролан Гаррос" чемпиони 5 сетда аниқланди

Ҳозиргина эркаклар ўртасидаги яккалик мусобақасининг чемпиони аниқланди. Ҳал қилувчи финал учрашувида дунёнинг учинчи ва тўртинчи рақамли теннисчилари - испаниялик Карлос Алькараз ҳамда германиялик Александр Зверев ўзаро тўқнаш келишди. 

Тўрт соату 20 дақиқа давом этган баҳс ғолиби 5 сет натижасига кўра аниқланди. Алькараз 6/3, 2/6, 5/7, 6/1, 6/2 ҳисобларида ғалаба қозониб, "Ролан Гаррос" бош совринини қўлга киритди. Бу билан у теннисчиларнинг ўзаро учрашувларидаги ҳисоб мувозанатини ҳам тиклаб қўйди - 5:5. 

Финал учрашуви статистикаси:

Карлос Алькараз - 3 та эйс, 6 та қўшхато, 9 та брейк

Александр Зверев - 8 та эйс, 6 та қўшхато, 6 та брейк

Испаниялик теннисчи фаолиятидаги учинчи "Катта Дубулға" турнири титулига эга чиқди. Париж кортларидаги икки ҳафталик меҳнат 21 ёшли Карлосга 2000 рейтинг очкоси ва 2 миллион 400 минг АҚШ доллари миқдоридаги мукофот пулини тақдим этди. У эртага эълон қилинадиган ATP рейтингида дунёнинг иккинчи ракеткасига айланади. Вице-чемпион Зверев эса 1300 очко ва 1 миллион 200 минг долларга эга бўлди.