23 май 09:55
Янгиликлар

Теннис

"Ролан Гаррос". Мария Саккари ғалаба билан бошлади

Франция пойтахти Париж шаҳрида "Катта Дубулға" туркумига кирувчи нуфузли турнирнинг асосий тўр баҳслари бошланди.

Аёллар ўртасидаги баҳсларда сайёрамизнинг тўртинчи рақамли теннис маликаси Мария Саккари биринчи даврада қийинчиликка дуч келмади. Грециялик теннисчи WTA рейтингининг 95-поғонасидан жой олган франциялик Клара Бюрелни 6/2, 6/3 ҳисобида таслим этди.

Бир дақиқаси кам бир ярим соат давом этган учрашувда Мария 3 та эйс зарбани амалга оширди. Бу теннисчиларнинг ўзаро ўтказган илк учрашуви сифатида тарихга муҳрланди. Энди Саккари иккинчи босқичда чехиялик Каролина Муховага қарши кортга чиқади. Чех теннисчиси биринчи даврада франциялик Кароль Моннедану устун келди - 6/3, 6/3.