Самарқанд боксидаги ютуқ ва камчиликлар, муаммолар муҳокама қилинди

Ишчи гуруҳнинг Навоийдан кейинги манзили Самарқандга бўлди. Федерация вакиллари 6 май кунги ташриф давомида шаҳардаги Спортнинг ўйин турларига ихтисослашган болалар ўсмирлар спорт мактабига боришди. Ушбу даргоҳда йўлга қўйилган бокс машғулотларини кузатар экан, федерация раисининг биринчи ўринбосари ёш боксчилар билан мулоқот қилди, улар билан суҳбатлашиб, керакли тавсияларини берди. Боксчи болакайлап билан ўзига хос кичик машғулотлар олиб борилди. 

Шундан сўнг "Ёшлар маркази"да Ўзбекистон бокс федерацияси Самарқанд вилояти бўлими мутасаддилари, вилоятдаги боксчи ва мураббийлар иштирокида йиғилиш ташкил этилди.

Учрашувда Самарқанд бокс мактаби тарбияланувчиси Фанат Қаҳрамоновнинг рейтинг асосида Токио Олимпиадасига йўлланма олгани эътироф этилди ва бу вилоят бокси учун катта ютуқ эканлиги таъкидланди. 

Йиғилиш давомида шунингдек вилоят боксидаги муаммолар, ишни ташкил этишда юзага келаётган камчиликларни бартараф этиш масалалари кўтарилди. Мураббий ва спортчилар бевосита ўз таклифларини бокс федерацияси раҳбариятига билдириш имконига эга бўлдилар.

Ўз навбатида Сакен Полатов юзага келаётган муаммоларни бартараф этиш учун федерация эшиги доим очиқ эканлиги, бу борада ёрдам кўрсатишга тайёр эканлигини билдирди.

Қолаверса, вилоят боксини янада ривожлантириш учун мураббий ва ҳакамлар малакасини ошириш, шу орқали тажрибали кадрлар тайёрлаш, ҳамжиҳатлик билан ишни ташкил этиш лозимлиги алоҳида қайд этиб ўтилди.

Ўзбекистон бокс федерацияси матбуот хизмати