Самарқандда кураш бўйича Ўзбекистон чемпионати бошланди

Бугунги кунгача Хитой Тайпейи, Афғонистон, Индонезия, Ҳиндистон ва Эрон кураш федерацияларида мамлакат чемпионатлари якунланланиб, терма жамоа аъзолари саралаб олинди.

Кеча эса кураш ватани Ўзбекистонда мамлакат ички чемпионати баҳслари бошланди. Йилнинг муҳим мусобақасида тарихий Самарқанд шаҳри мезбонлик қилмоқда. Чемпионатга барча ҳудудлардан 800 нафарга яқин номдор полвонлар ғолиблик учун гиламга чиқишмоқда.

Кеча мамлакат чемпионатининг дастлабки кунида мусобақанинг очилиш маросими ва 60, 66 кг вазн тоифасидаги эркаклар ҳамда 48, 52 вазндаги аёллар баҳслари бўлиб ўтди.

Очилиш маросимида Халқаро Кураш ассоциацияси, Ўзбекистон Республикаси Спортни ривожлантириш вазирлиги, Бош прокуратура, Самарқанд вилояти ҳокимлиги ва Ўзбекистон Кураш федерацияси мутасаддилари иштирок этишди.

Чемпионатни Халқаро Кураш ассоциацияси администрацияси раҳбари Мансур Мирзаев бевосита Самарқанд шаҳрида кузатиб бормоқда.

Бугун эркаклар ўртасида 73, 81, 90 кг, аёлларда эса 57, 63, 70 кг вазн тоифаларида ғолиб ва совриндорлар номи маълум бўлса, эртага -100, +100 кг ва 78, 87, +87 вазндаги курашчилар ўзаро беллашадилар.