Самарқандлик спортчилар тақдирланди

Э.Турдимов мамлакатимизда спортга берилаётган эътиборни алоҳида таъкидлаб, яратилган имкониятлардан унумли фойдаланиб халқаро майдонларда Ватанимиз шарафини муносиб ҳимоя қилиб келаётган спортчиларга миннатдорлик билдирди. 

Бундай учрашувлар орқали спортчиларни бўлғуси мусобақалар олдидан ўзига хос руҳлантириш ҳамда юртимизда ёшларни спортга кенг жалб этиш асосий мақсад эканлигини қайд этди. Шунингдек, навбатдаги Олимпия ўйинларида самарқандлик спортчилар тарихий ғалабаларни қўлга киритиб, кириб келаётган 2021 йил Самарқанд спорти йили бўлиб тарих зарварақларидан жой олиши лозимлигини таъкидлади.

Шундан сўнг, спортчилар ва уларнинг мураббийлари вилоят ҳокимлигининг ташаккурномалари ва эсдалик совғалари билан тақдирланди.

– Айни пайтда Олимпия ўйинларига йўлланма берувчи мусобақаларга қизғин тайёргарлик кўрмоқдамиз, – дейди Самарқанд давлат университети талабаси, бокс бўйича Ўзбекистон терма жамоаси аъзоси, спорт устаси Навбаҳор Ҳамидова. 

– Шу пайтгача 4 карра Ўзбекистон чемпионлигини қўлга киритганман. Ёшлар ўртасидаги Осиё ўйинларида иккинчи ўринни эгалладим. 

Мақсадим Олимпия ўйинларида ҳам иштирок этиб, юртимиз байроғини баланд кўтаришдан иборат. Бугунги тадбирда вилоят ҳокими томонидан билдирилган юксак эътироф бизни янада руҳлантирди. Энди янада кўпроқ ўз устимизда ишлаб, билдирилган ишончга муносиб ғалабалар билан жавоб берамиз.

Тадбир якунида концерт дастури намойиш этилди.