Сарбон Эрназаров ЖЧга тайёргарлик, эътибор ва асосий рақиблари ҳақида гапирди

Ўзбекистон самбо ассоциацияси матбуот хизмати ушбу ЖЧ олдидан терма жамоамиз аъзоларининг фикрларини мухлислар эътиборига ҳавола қилишда давом этади. Бугун терма жамоамиз етакчиси Сарбон Эрназаров меҳмонимиз бўлади. 

"Тайёргарлик жараёни аъло даражада ўтмоқда. Терма жамоа аъзоларининг спорт формаси яхши. Муҳит ҳам ажойиб. Шуни алоҳида айтишни истардимки, тайёргарлик жараёнида самбо ассоциациямиз, шунингдек МОҚ ва вазирлик томонидан ҳам алоҳида эътибор бўлмоқда. Тўғрисини айтсам, бундай эътибор аввал бўлмаганди. Витаминизация, массажчи ва психологлар биз билан ишлашмоқда. Бу бизга ҳар томонлама кўмак бўлмоқда. Бизнинг ЖЧдаги муваффақиятли иштирокимизни барча истамоқда. Буни ҳис қилиб турибмиз. 

Асосий мақсадимиз албатта ғалаба қозонишдир. Ҳар бир спортчи гиламга чиққанда фақат ғалаба учун курашади. Ўз уйимизда юзимизни ёруғ қилиб, ватанимиз байроғини юқори кўтармоқчимиз. Бизни бутун Ўзбекистон томоша қилади. Мақсадимиз фақат ва фақат олтин медаль қўлга киритишдир.  

Мен мусобақада -71 кг вазн тоифасида юртимиз шарафини ҳимоя қиламан. Бу ўрта вазн бўлганлиги учун рақобат катта бўлади. Бу ерда асосий рақиблар бор. Бироқ, ҳар бир спортчи ўзига хос "сюрприз" тайёрлаши мумкин. Аммо барибир асосий рақиблар бор ва уларга қарши ҳар томонлама тайёргарлик кўрмоқдаман. Россия, Грузия, Қозоғистон ва Беларусь, Франция вакиллари кучли рақобат кўрсатади. Шунинг учун, бу вазнда кимнидир аниқ чемпион бўлишини тахмин қилиб бўлмайди. 

Ўз юртимда илк маротаба мусобақада қатнашаётганим йўқ. Бунгача Ўзбекистондаги турли нуфузли мусобақалар, Осиё чемпионатларида қатнашганман. Лекин жаҳон чемпионатида илк маротаба қатнашяпман ва бунинг босими албатта бор. ЖЧда босим доимо бўлади. Умид қиламанки, ўз уйимиздаги деворлар, мухлислар бизга ёрдам беришади", - деди Сарбон Эрназаров.