Шаҳрам Ғиёсов тасдиқлади. Жанг Эҳромлар юртида камар учун кечади

Чарм қўлқоп устамиз 23 май куни Мисрда британиялик Жек Кеттеролга қарши WBA мунтазам чемпионлик камари учун жанг ўтказади. Бу маълумотни сайтимизга берган интервьюсида Ғиёсовнинг ўзи ҳам тасдиқлади. 

"Алҳамдулиллаҳ, жангим расман тасдиқланди. Бу янгиликни ҳаммадан кўра ўзим кутгандим. Аллоҳ хайрли қилсин. Бир-икки кунда Туркияга учиб кетаман, жанг олдидан машғулотим ўша ерда бўлади. Жангга Дмитрий Биволнинг мураббийи Геннадий Машьянов қўл остида тайёргарлик кўраман. Мен билан бирга Дмитрий Бивол, Ражаб Бутаев ва Баҳодир Жалолов ҳам машғулотларга киришади. Баҳодирнинг жанги бошқа кардда ўтказилади. Жангимда ўртага WBA Regular камари ўртага қўйилади", - деди Ғиёсов. 

Эслатиб ўтамиз, Шаҳрам Ғиёсов ҳам, Жек Кеттерол ҳам 32 ёшда. Британиялик боксчи ўтган йили иккита ғалаба билан ярим ўрта вазн тоифасига кўтарилди ва ҳозирда WBA рейтингида олтинчи ўринни эгаллаб турибди.