Шанхай "Мастерс" бош соврини Польшага кетди

ATP рейтнигида 17-поғонада бораётган польшалик теннисчи ҳал қилувчи финал учрашувида дунёнинг еттинчи ракеткаси, россиялик Андрей Рублёвни 6/3, 3/6, 7/6(8) ҳисобларида мағлуб этишни уддалади. Теннисчиларнинг ўзаро учрашувларидаги ҳисоб Хуберт фойдасига ўзгарди - 3:2. 

Эътиборлиси, Гуркач ҳал қилувчи учинчи сетнинг тай-брекида аввалига 2:5, кейин матч-болл ҳолатдаги 5:6 ҳисобидан чиқиб кетишга муваффақ бўлди. Икки соату 9 дақиқа давом этган баҳсда Рублёв 13, Гуркач 21 та эйс зарбани амалга оширган. Иккала теннисчи ҳам қўшхатога йўл қўймади. Брейклар сони ҳам бир хил бўлди - 1 тадан. 

Польшалик теннисчи фаолиятида иккинчи бор "Мастерс" турнирида чемпион бўлди. У 2021 йилги Майами "Мастерс" турнирида ҳам бош совринни қўлга киритганди. Умумий ҳисобда бу унинг фаолиятидаги еттинчи ATP совринга айланди. 

Шанхайдаги бир ҳафталик меҳнат Гуркачга 1000 рейтинг очкоси ҳамда 1 миллион 262 минг 220 АҚШ доллари мукофот пули келтирди. Рублёв эса 600 очко ва 662,360 доллар ишлаб олди. Хуберт бугун эълон қилинадиган ҳафталик рейтингда 11-ўринга кўтарилиб олади. Финалдаги мағлубиятга қарамай, Рублёв 5-ўринга жойлашади. Бу унинг фаолиятидаги энг юқори рейтинг ўрни ҳисобланади.