Shenzhen 4. Сергей Фомин 6-ракеткага қарши уч сетдан иборат мураккаб учрашув ўтказди

Challenger 75 тоифасига кирувчи мусобақанинг мукофот жамғармаси 100 000 АҚШ долларини ташкил қилади. Саралаш баҳсларидаги муваффақиятли иштирок сабаб асосий тўрга йўлланма олган ҳамююртимиз Сергей Фомин 1/8 финалда турнирнинг олтинчи ракеткаси, япониялик Шо Шимабукурога қарши жуда қийин ўйин ўтказди. 

Уч сет давом этган учрашувда Шо 4/6, 7/5, 7/5 ҳисобларида ғалаба қозониб, чорак финалга йўл олди. Сергей учинчи сетнинг 11-геймидан кейин ўзини ёмон ҳис қилгани боис шифокорлар хизматига мурожаат қилишга мажбур бўлди. Шифокорлар билан узоқ мулоқотдан кейин теннисчимиз баҳсни охирига етказиш учун кортга қайтди, аммо ҳолати панд берди.   

Икки соату 35 дақиқа давом этган учрашувда Кунчиқар юрт вакили 14, мамлакатимизнинг иккинчи ракеткаси эса 8 та эйс зарбасини амалга оширди. Қўшхатолар Фоминда кўпроқ бўлди - 4 га 2. Энди Шо 1/4 финалда турнирнинг иккинчи ракеткасига қарши кортга чиқади. 

Таққослаш учун, Фомин ATP рейтингида 492, Шимабукуро 212-ўринни эгаллаб турибди. Бу теннисчиларнинг ўзаро ўтказган иккинчи учрашуви бўлди. Уч йил аввал улар Дэвис Кубоги доирасида ўзаро тўқнаш келишган ва ўшанда Сергей рақибини икки сет натижасига 7/6(1), 7/5 ҳисобида таслим этган эди.