Шоҳасан Мирзаматов Қозоғистонда жанг қилади. Унинг навбатдаги рақиби Бразилиядан

Аслида, 5 октябрь куни Тошкент шаҳрида ташкил этилиши керак бўлган турнирда ҳамюртимиз Шоҳасан Мирзаматов ҳам иштирок этиши ҳақида хабар берилган эди.

Унинг Octagon 64 турнири доирасидаги рақиби ким бўлиши эълон қилинди. Унга кўра, ярим ўрта вазнли ҳамюртимиз бу сафар бразилиялик Педро Фариас билан тўқнаш келади.

Мусобақанинг марказий жанги ўрта вазн чемпиони, ўзбекистонлик Ислом Болтаев ҳамда Бауржан Куанишбаев ўртасида кечади.

Маълумот учун, Шоҳасан фаолияти давомида 16 та жанг ўтказиб, 13 ғалаба ва 3 мағлубият қайд этган. У сўнгги жангини 19 июль куни қозоғистонлик Маҳир Мамедовга қарши ўтказиб, 2-раундда нокаут орқали ғолиб бўлган эди. Рақиб ҳисобида эса 10 та ғалаба ва 7 та мағлубият бор.